skip to main |
skip to sidebar
2:44 م
MAGDY REZK
قصيدة : حب بجد جريدة الرجاء العدد 12
جريدة الرجاء العدد الثانى عشر بتاريخ 1/10/2014
بأدور على حب بجد
حب محبوش حد لحد
حب يشدنى م الدنيا شد
نفسى اعيش أحلام
وأغرق ف بحر الغرام
يا ترى ممكن ألاقى حد
بيدور على حب بجد
نفسى أعيش الحب بحرية
وأسهر الليالى الهنية
أكون لحبيبى وحبيبى بس ليا
نعيش سوا افراحنا
ونداوى لبعض جراحنا
والفرح لآخر عمرنا يتمد
هأدور على حب بجد
نسهرعلى ضى الشموع
ونبعد عن أى دموع
ونحب بصوت مسموع
ولا يفصلنا ف يوم سد
بأدور على حب بجد
أعيش حبيبى اجمل الأمانى
ويكون حبنا أحلى من الأغانى
نتهنا ولا يوم حد فينا يعانى
ننسى ماضينا ونعيش اليوم والغد
بأدور على حب بجد
نبقى ع الحب متعاهدين
وع الاخلاص متواعدين
ولا تفرقنا ايام ولا سنين
نكون واحد مش اتنين
وحدتنا صنعها الصدق والود
وهو دا الحب اللى بجد
كلمات مجدى رزق
2:19 م
MAGDY REZK
قصيدة : حمامة وبندقية
جريدة الرجاء العدد الثانى عشر بتاريخ 1/10/2014
الغدر ماسك سلاح
والكره ماسك بندقية
و حمامة السلام
واقفة بعدهم بشوية
الغدر مستنى الليل
والكره مستعجل
والبراءة بتسال ليه
بتفكروا فى الاذية
نظرات الكره بتخوف
والغدر افكاره شر
شيطانه مش مرسيه
على اى بر
والحمامة فى منقارها
غصن زيتون
طلعته من الميه
الكره والغدر
الدم مالى اديهم
الشر فى عينيهم
والبراءة ماسكة قلم
بترسم بيه علم
بتكتب عليه انا مصرية
هى مش قد السلاح
لكن قالت انا اقوى
انا معايا الحق
يا ترى هتنجا
ولا هتروى الارض بدمها
وتبقى نهاية ماساوية
صوت الحمامة ضعيف
بيقول يا رب
خليها ربيع مش خريف
سلام مش حرب
واملا بالحب
كل قلوب البشرية
دى ارادتك يا الله
ان البشر يعرفوك
ركبهم تسجدلك
وبروحهم يعبدوك
ويكونوا ولادك
اللى بيحبوا اعمالك
وبيحبوك
ويملا السلام
الكرة الارضية
وتعيش الحمامة
